أخبار عاجلة

باسم مرسي يكشف تفاصيل أزمته مع الزمالك

باسم مرسي يكشف تفاصيل أزمته مع الزمالك
الأربعاء - 09 يناير 2019 - 12:00 ص"

كشف باسم مرسي مهاجم الزمالك عن تلقيه اتصالًا من مسؤلي الزمالك للعودة مرة أخرى للمشاركة في تدريبات الفريق وعدم الانضمام لصفوف نادي سموحة، بعد أيام قليلة من الإعلان عن إعارته لصفوف الفريق السكندري.

ونشر مرسي عبر حسابه الرسمي على تويتر تفاصيل الأزمة حيث كتب:"تلقيت اليوم اتصال من مسئول ف نادى الزمالك يطالبنى بالرجوع ، قالى بالنص " عندى ليك مفاجأة ، الزمالك عايزك ترجع و تروح نادى تانى بدل سموحة و احنا اللي أخرنا البطاقة الدولية عشان لو كنت لعبت الماتش مكناش هنعرف نرجعك ".

وتابع مهاجم الزمالك:"بسبب موضوع معين بقيت انا طرف فيه بدون ارادتى ، دلوقتى قدامى اختيار من اتنين الاول انى العب ف الزمالك و المدرب مش عايزنى بالف جنيه ف ست شهور والاختيار التانى انى انتقل لفريق ترتيبه الاخير ف الدورى . هل انا بعد ما لعبت اربع مواسم ف الزمالك ، حصلنا فيهم على ٥ بطولات و احرزت ٥٣ جول ، دة يكون مصيرى من مسئولين نادى الزمالك ؟!".

وأضاف:"قبل كدة انا مكنتش بطلع اتكلم ، بس الموضوع يوصل ان يتقال ان التاخير بسببى فى موضوع البطاقة الدولية و تشويه سمعتى ان  دة بسبب خلاف مادى بينى و بين النادى اليونانى ف دة مش صحيح".

واستطرد:"انا فى وقت اقامتى كاملة ف اليونان ، حصلت على ٥ الاف يورو فقط و اتنازلت عن جميع مستحقاتى للزمالك و جددت سنتين اتنازلت فيهم عن ٤ مليون جنيه عشان يوافقوا على احترافى".

واستكمل:"و عند انتقالى اعارة لسموحة جددت سنة كمان على بياض .. انا هرجع نادى الزمالك مش لو بالف جنيه لو ببلاش لان شرف ليا انى العب ف نادى الزمالك.. مكنتش حابب انى اتكلم رغم اتصال عدة برامج بيا من وقت وصولى للقاهرة لتوضيح عدة امور بمقابل مادى بس انا كنت برفض .

وواصل:"انا حالياً بعد ما استقريت فى الاسكندرية و نقلت اسرتى و اغراضى و استأجرت محل سكن ، تم ابلاغى انى لازم الغى كل دة و ارجع حالاً يا اقعد ست شهور ف البيت.

واختتم:"يارب الناس الكانت بتتهمنى انى مقصر طول الوقت و بعمل مشاكل تكون الصورة واضحة لهم ، انا طول الوقت بتحط ف مشاكل انا مش سبب فيها . اسف على التطويل بس كان لازم التوضيح.

الجدير بالذكر أن باسم مرسي تمت إعارته مطلع الموسم الجاري إلى صفوف فريق لاريسا اليوناني لمدة عام وقام اللاعب بالتنازل عن مستحقاته لدى القلعة البيضاء نظير السماح له بالرحيل، لكنه لم يشارك كثيرًا مع الفريق اليوناني حيث شارك في 5 مباريات فقط معهم حصل خلالهم على بطاقة حمراء، بعد ذلك عاد للقاهرة في إجازة قصيرة وأثناء سفره لليونان مرة أخرى فوجئ بمنعه من السفر بسبب التجنيد وهو ما دفعه لفسخ تعاقده مع الفريق بعد فترة إعارة لم تستمر سوى 4 أشهر.

وقد تلقى اللاعب العديد من العروض خلال الأسابيع الماضية بعد أن رفض السويسري كرستيان جروس المدير الفني للزمالك فكرة عودة اللاعب لصفوف الفريق في الوقت الحالي، حيث أخطر إدرة النادي أن تقتصر قائمة الفريق على المجموعة الموجودة حاليًا، وطلبت أندية الانتاج الحربي وبتروجت وسموحة استعارته، قبل أن يعلن مسؤلي الزمالك عن موافقتهم على طلب سموحة ومنحهم اللاعب مجانا حتى نهاية الموسم الجاري، نظرًا للعلاقة الطيبة التي تربط بين إدارتي الناديين، إلا أنه أعلن اليوم عن تراجع الزمالك في قراره.